روايه فنجان قهوة (عوده مېت ) الفنجان الاول حصريه وجديده

روايه فنجان قهوة عوده مېت الفنجان الاول حصريه وجديده 
جمال شاب في أوائل التلاتينات متوسط الطول جسمه لا هو مليان ولا نحيف دقنه دايما مهذبة وشنبه متظبط وشه فيه هدوء كده يطمنك وعنيه فيها طيبة بتشدك ليه من أول نظرة. من أسرة بسيطة جدا من الأرياف وحيد أبوه وأمه ساب البلد ونزل على القاهرة يدور على لقمة عيش يقدر يكون بيها نفسه ويساعد أهله. بالرغم من بساطة حاله إلا إن دايما شكله نضيف ولبسه مهندم يلبس بنطلون قماش غامق وتيشيرت سادة وجاكت خفيف لو الجو بارد.
أوضته صغيرة في سطح بيت قديم في حارة شعبية فيها سرير حديد بسيط ومرتبة مفرودة عليه جنبه ترابيزة صغيرة عليها أباجورة وإزازة ميه وفي الركن فيه دلاب معدن متآكل من الرطوبة وعلى الحيطة صورة قديمة لأبوه وأمه متعلقين جنب مصحف صغير على رف.
كل يوم جمال بيصحى على صوت منبه موبايله اللي صوت رنته مكسر الساعة خمسة الصبح. أول ما يصحى يمد إيده يطفي المنبه يقوم يقعد على السرير لحظات يفرك عينيه ياخد نفس طويل كده كأنه بيشكر ربنا على يوم جديد يقوم يغسل وشه يصلي الفجر وبعدين يفطر على رغيفين عيش ومعاهم جبنة بيضا وشاي.
ينزل من السطح بالسلم اللي كل درجة فيه بتزين بصوتها يوصل للشارع يبتسم وهو بيصبح على أم حسن اللي بتكنس قدام بيتها يقول لها
صباح الفل يا أم حسن.
ترد عليه وهي لابسة جلابيتها وتربط الطرحة
صباح الورد يا جمال يا ابني ربنا يفتحها في وشك.
يكمل مشيه شوية يقابل عم سيد صاحب الكشك اللي في أول الحارة يقوله
إزيك يا عم سيد
يرد الراجل وهو بيضبط الرصيف قدام الكشك
زي الفل يا حبيبي على فين بدري كده
على القهوة لازم أكنس قبل الزباين ما تيجي.
الناس كلها بتحبه في الحارة مؤدب وبيساعد الكل ولا عمره اټخانق مع حد والكل يقول عليه جمال ابن ناس.
يمشي على مهل والشارع لسه نايم بس الحارة فيها ريحة الحياة ست بتكنس عيل بيعيط صوت واحد بيقفل باب عربيته وجمال في وسط ده كله ماشي بنفس الخطوات كل يوم رايح على القهوة اللي بيشتغل فيها عامل بوفيه قلبه رايق ومخه بيجهز ليوم شغل جديد.
جمال مشي في الحارة بخطوات هادية الشمس لسه بتفرك عنيها والنسمة الصباحية كانت بتداعب وشه. وصل ناصية الشارع قلبه اتفتح على الريحة اللي جاية من فرن العيش. لما عدى على عم عوض البقال اللي دايما بيشرب شاي على الكرسي الخشبي قدام دكانه سلم عليه
صباح الخير يا عم عوض.
صباح النور يا جمال متأخر ليه النهارده يا ابني !
ضحك جمال وقاله
والله يا عم عوض انا مش متأخر ساعتك انت اللي بتاخر . صباح الفل عليك.
كمل طريقه