أنتحار طبيب نفسي الفصل الاول بقلم مني محمود بركات حصريه وجديده

زينب فاتحة العيادة لأي سبب
مين مدام زينب !
ست كبيره في أوائل الخمسينات بتشتغل مساعدة ل دكتور بيبرس في العيادة وكانت بتشتغل مساعدة ف البيت عنده زمان وهي أصغر من كدة
عرفت منين !
منها لأنها ست ودوده جدا وبتحب تتكلم مع الناس وترغي وتفضفض كتير
لما وصلت لاقيت فعلا العيادة مفتوحة ومدام زينب لابسه أسود وقاعدة سرحانه ودموعها نازله قربت منها واتكلمت بهدوء
مساء الخير
مساء النور ... اهلا يا آنسه راجيه اتفضلي
البقاء لله يا مدام زينب ربنا يرحمه ويغفر له ويسكنه فسيح جناته يارب ويلهمكم الصبر حبيبتي
بكائها زاد وهو بترد عليا
ونعم بالله يا حبيبتي ونعم بالله
ا انتي فاتحة العيادة ليه 
في ناس متعرفش الخبر ف كان لازم افتح عشان ألغي بنفسي كل الحجوزات وأسيب ورقه علي الباب فيها الخبر
اه فهمت ... ربنا يرحمه أنا بصراحة اټصدمت اوي مكنتش مصدقه نفسي وأنا بقرأ الخبر علي الفيس
بصتلي بأستغراب 
الفيس !! الله ولما أنتي عارفه من علي الفيس جيتي ليه وبعدين أنتي اصلا معادك مش انهاردة
اتوترت شويه بس سيطرت علي نفسي وأنا برد عليها 
لا ما احم أنا عارفه أن معادي مش انهاردة بس أصل قلت يمكن الخبر أشاعه سخيفه وجيت أتأكد بنفسي
للأسف مش أشاعه ربنا يرحمه ويسامحه بقا
مدام زينب ممكن اسألك سؤال 
أسالي يا بنتي
هو دكتور بيبرس أنتحر فعلا ولا
قاطعتني بحزم وثقه
مفيش ولا أنتحر
وحضرتك متأكدة كدة ليه 
لأني ببساطة كنت عندهم في البيت لما دخلو عليه وأكتشفو أنه اڼتحر
الحزن سيطر عليا ودموعي نزلت من غير ما أحس
طب ليه ليه دكتور زيه في بدايه حياته وشاطر ومحبوب من كل الناس يعمل في نفسه كدة أنا مش قادرة أستوعب ... تعرفي يا مدام زينب أن دكتور بيبرس كان سبب أساسي أني أقدر أكمل حياتي وأقف علي رجلي بعد كل الصدمات اللي خدتها ... كل مرة كنت باجي هنا كنت بنزل من عنده وأنا كلي طاقه ايجابيه وحاسه بتفائل وراحه كبيره ... ازاي ينتحر ازاي في حاجة غلط والله مش معقول بجد
نصيب يا بنتي نصيب ومقدر ربنا يصبر أهله يارب أنا سايبه مدام إلهام والدته في المستشفى مستحملتش المنظر و وقعت من طولها ربنا يصبرها يارب
أنتي بجد متعرفيش هو عمل كدة ليه 
بصتلي بهدوء وسكتت استجمعت شجاعتي وقررت أواجه وأبطل هروب واتكلمت بصراحة
بصي يا مدام زينب أنا مش هكدب عليكي بصراحة أنا كنت شبه متأكدة أن الموضوع چريمة قتل لأني عارفه دكتور بيبرس من مدة طويله وعمري ما تخيلت أنه ينتحر وجايه عشان ابدء ادور في الموضوع وانشره علي صفحتي وقناتي بس لما انتي اكدتيلي أن الدكتور أنتحر أنا دلوقتي عايزة افهم ل سبب شخصي والله العظيم مش ل صفحتي ولا قناتي أنا كنت بكمل بشغف وطاقه عشان كلام الدكتور ليا عن الحياه والمثابرة والنجاح أمنت بكلامه وصدقته ف لما الاقيه أنتحر كدة كل اللي كنت بسمعه منه كدب في كدب أرجوكي لو تعرفي حاجة قوليلي خليني أرتاح لما أفهم وأوعدك إني منزلش ولا كلمه في الموضوع دا ابدا والله ارجوكي
قولت اخر كلامي وانا دموعي نازله ... كنت فعلا حاسه باليأس جدا ازاي مصدر الطاقه ليا ينتحر ازاي اصدق كل كلامه ليا عن الحياه والحب والشغف ازاي 
مدام زينب بصتلي بشفقه وتفكير وانا فضلت بصلها برجاء ودموعي مش بتقف كل اللي
فكرت فيه ورتبتله وأنا جايه رميته ورا ضهري مبقاش مهم خلاص مش مهم الصفحة ولا القناه مش مهم السبق الصحفي مش مهم اي حاجة قصاد اني ارتاح من الإحساس اللي جوايا دلوقتي
اتنهدت تنهيدة طويله قبل ما تنطق وتقولي
هقولك السبب يا راجيه هقولك عشان ميحصلكيش أي انتكاسه وأكون ليا يد فيها يا بنتي كفايه اللي راح في عز شبابه كفايه اوي كدة
يتبع ...