رواية بين أحضانه زهرة سيف الدين بقلم إدمان سيما حصريه وجديده
رواية بين أحضانه زهرة _سيف الدين بقلم_إدمان_سيما حصريه وجديده
ديما تقراو قصص الضرة لي تحكي على الزوجة الثانية لي يحبها راجلها ويسمح فالأولى مالا انا نقلكم انا الزوجة الاولى لي راح تغير هذا المفهوم تحارب الدنيا علاجال كرامتها ماشي كامل نسا يحبو الذل صح ربي حلل التعدد بصح بشروط ماشي خاطر ماحبهاش ولا ماعجباتوش ولا خيروهالو دارهم يروح يعاود الزواج هي تان ولية ومن حقها تعيش مهنية وراجلها يكون ليها وحدو راح نقلب الموازين راح نغيرهم وراح تتعلمو بزااف صوالح .......
قاعدة في طوموبيل من جيهة الشوفور نحوس نعرف عليها كبيرة وصغيرة ډخلتنا ليوم جديدة ولازم نتعرف على كامل مزايا تاعها باش نقنع الشاري ونفهمو من 9 تاع صباح وانا معاها حتى لضك ايه هذي هي خدمتي عندي شهر ونص ملي بديت نخدم هنا يجيبو كل انواع طوموبيلات من الخارج ويعرضوهم للبيع جاية في بنيان مش كبير بزاف الايطاج لي فلرض جاي كامل زجاج وفيه شوية طوموبيلات للعرض وتحت الارض ڨراج كبير للصيانة ثاني فيه طوموبيلات وخدامين كيما نقولو مخزن تاع سيارات كل مانبيعو يزيدو يطلعو منهم هذا تفصيل صغير على خدمتي... من هذاك التعب تكيت على لكوسانة حتى طبطب عليا فلكارو عمي خالد العساس ولي ينظف ثما فتحتلو قالي واش بنتي راحو كامل يفطرو راهي 12 روحي تريحي ضك يبداو يجو الغاشي ماتصحلكش شفت مع الساعة تخلعت قتلو والله مافقت للوقت بصح عمي مانيش جيعانة جبت سقايط كي نجوع ناكل يعطيك الصحة هو راح وانا كملت تكيت نخمم هي صح جيعانة بصح الله غالب ماعنديش باش نفطر دورو لي طيحلي في يدي نخلص بيها لكرا ونشري لبناتي لي هما اجمل ماعندي فدنيا هادي نحيها من لحمي ونمدهالهم المهم مايحتاجوش ومايحسوش بنقص عندي زوج بنات ربي يحفظهملي يقراو في الابتدائي توٱم بصح مايتشابهوش وحدة تشبهلي ووحدة لباباها يعني توأم غير حقيقي لوكان ماشي هذو الزوج وردات لي ضواولي حياتي راني هبلت ولا كاشما صرالي نتقوا بيهم وعلاجالهم راني نكمل ونجاهد من الشي لي صرالي والصدمات المتتالية لي تلقيتهم من اقرب وأعز الناس كان عمري 19 سنة كي تزوجت وفي نفس الوقت كنت نقرا اولى جامعي تخصص تسيير واقتصاد تعرفت عليه انسان هو ثاني كان صغير 25 سنة خدام بريفي الخاصحبيتو وتعلقت بيه لدرجة ماهمني لا سني لا سنو لا لمستقبل لمهم نكون معاه نعيش معاه بلحلوة ولمرة بصح ضك لوكان يسقسوني نقول هذا تفكير غالط وخطأ خذيتو في حقي تزوجنا بلقليل اهلي كي سقساو عليه مالقاوش فيه حاجة تتعاب كان شرطي الوحيد اني نكمل قرايتي وهو قالي راني قابل بحكم كان يبان يحبني ويعشق فيا ماكانتش عندو دار وكان ضد فكرة يعيش
