قصة التوأم الثلاثه
قصة التوأم الثلاثه
اللي قدامك في الصورة دول ٣ اولاد توأم متطابقين قصتهم واحدة من اشهر القصص في تاريخ علم النفس و الأخلاقيات العلمية واللي اتعمل منها واحد من أشهر الأفلام الوثائقية على نيتفلكس
الحكاية بتدور سنة ١٩٨٠ مع شاب إسمه بوبي واللي كان في الوقت ده عنده ١٩ سنة ولسه في أول سنة ليه في الجامعة بوبي كان شاب خجول بطبعه وانطوائي ودايما في حاله مش بيتكلم مع حد وعلشان كده دائرة معارفه واصدقائه كانت قليلة جدا
لحد ما في يوم وهو داخل الجامعة لاحظ ان كل اللي بيقابله بيبصله بنظرات غريبة وأن الكل مركز معاه لدرجة أن فيه بعض الطلاب لما كانت بتقابله كانت بتسلم عليه وهو كان مستغرب لأنه ميعرفش حد فيهم
لحد ما فجأة وهو ماشي لقي شخص بيقرب منه وفارد درعاته علشان يحضنه وهو بيقوله إدي أنت أخيرا رجعت وحشتني جدا
طبعا بوبي علشان زي ما قولنا انطوائي وتقريبا بېخاف من الناس جري بسرعة من قدام الشخص ده وهو بيقول أنا مش إدي انا اسمي بوبي
لكن الأغرب أن بعدها قابل اكتر من واحد من الطلاب وهو بيعيد نفس الكلام
ادي كنت مختفي فين الفترة اللي فاتت ديه
الطلاب اللي في الجامعة كانت بتتكلم معاه كأنهم عارفينه كويس رغم ان مفيش علاقة بتربطه مع أي حد فيهم
بوبي في الوقت ده حس پخوف وأن فيه حاجة مش طبيعية لحد ما قابله واحد إسمه مايكل وبدأ يفهمه أن كان فيه طالب معاهم في الجامعة إسمه إدي وان هو شبه بالضبط
بس إدي كان قايل انه هيدرس السنة ديه منزلي و أنه فعلا بقاله فترة مش بيظهر في الجامعة وعلشان كده الناس كانت بترحب بيك وبتسلم عليك فا رد عليه بوبي وقاله بس انا مش إدي انا اسمي بوبي ومعرفش حاجة عن اللي انت بتقوله
مايكل لما سمع الكلام ماكنش مصدق وقاله ازاي انت مش إدي ولأنه كان صاحب إدي اوي وعارف كل حاجة عنه قاله مش انت تاريخ ميلادك ١٩٦١
فا رد عليه بوبي ب استغراب وقاله ايوة فعلا ده تاريخ ميلادي قاله وكمان عايش مع أسرة بالتبني فا رد عليه ب استغراب وذهول اكتر وهو مش عارف ازاي عرف عنه الحاجات ديه وقال ايوة عايش مع أسرة بالتبني
لكن اللي يزيد ذهول بوبي اكتر لما مايكل قاله انت كنت بتحب تلعب مصارعة وانت في ثانوي وديه بردو معلومة حقيقية عنه بس كل ده هو بيكلمه عن شخص إسمه إدي وعلى أساس ان هو الشخص ده
طبعا بوبي ماكنش مصدق اللي بيسمعه ولا عارف هو ازاي قدر يعرف عنه المعلومات ديه وكان مصمم انه مش إدي ولا يعرف حد بالإسم ده هنا مايكل وأصحابه قرروا يتصلوا ب إدي ويتأكدوا
