الخميس 18 يوليو 2024

نصائح لمطبخك سيدتي الجميله

موقع أيام نيوز

نصائح لمطبخك سيدتي الجميله 
نصائح مطبخية
١كلنا عندنا مشكلة ان الخضرة و
البقدونس بيدبلو و يبوظوا بسرعة في التلاجة
الحل
هو انك اول ما تيجي الخضرة .. اغسليها و نشفيها و هاتى علبة متوسطة من علب التلاجة البلاستيك الي عندك .. و حطي في الارضية بتاعها ورق كلينيكس او ورق مناديل مطبخ السميكة دي و حطي بعدها الخضرة او البقدونس .. و حطي بعد ما تخلصي وقبل ما تقفلى العلبه ورق فوق تاني غطي بيه باقي البقدونس .. كده هيعيش معاكي فترة اطول و يحتفظ بخضارة و ميصفرش ولا يبوظ
2 لو جيتي تسلقى بيض .. خرشوف .. كرنب .. اي حاجة من الحاجات الي بتطفى شكل الحلة بعد السلق دي .. وعاوزة الحلة ترجع زي ما كانت 

حطي فيها ماية و حطيها عالنار .. وحطي في الماية قشور لمون .. وبعد ما تاخد غلوتين تلاتة .. اغسليها عادي هتلاقيها رجعت جديدة زي ما كانت
3 لو عندك مكان معين متأكدة ان مصدر دخول وخروج النمل و عاوزة تتخلصى منه فعلا
هتروحي تجيبي ورقة جرنال او ورقة كراسة او اي ورقة .. و تروحي عالبوتجاز وتحرقيها و بعدين تلمي الرماد الي اتحرق ده برفق .. و روحي على المكان الي فيه تجمع النمل .. و حطي الرماد ده .. هتلاقي النمل اختفى تماما
4 لو قلقانه من الخضروات و الفواكة و انتي بتغسليها انها برضو مش نضيفة 
اتعودي دايما تجيبي الحلة او الطبق الي هتغسلى فيه الفاكهة و الخظار و حطي معلقة واحدة كبيرة خل في الماية الي هتنضفى بيها الخضار و الفاكهة .. الخل هيتقتل اي جراثيم ممكن متموتش بالغسيل العادي
5 لو عندك بيض بقاله مده في التلاجة و عاوزة تستعمليه و عندك شك ان كان بايظ ولا لاء 
هتجيبي البيضة و تجيبي كوباية ماية ساقعة مدوبة فيها معلقة ملح .. و حطي البيضة في الكوباية .. لو طفت على السطح .. تبقي باظت .. لو وقعت و سقطت تحت تبقي بنت حلال و اصيلة و لسة كويسة
6 لو عاوزة تسلقى بيض و وانتي بتحطيها في الحلة اتشرخت شرخ بسيط 
حطي في ماية السلق معلقة خل او شوية ملح في ماية السلق .. و بكدة هتستوي جوا قشرتها ومش هتبوظ ولا حاجة
7 لو بتسلقى بقوليات .. زي الفاصوليا البيضا و اللوبيا . كذلك سلق اللحمة و الفراخ 
متحطيش الملح إلا في الاخر خالص بعد ما الاكل يستوي .. لان لما بتحطي الملح .. مدة السلق بتطول اوووووي بعكس لما متحطيش الملح و تستني لما تستوي