الفاروق عمر بن الجزء التاسع والعاشر

الفاروق عمر بن الجزء التاسع والعاشر
ذكاء سيدنا عمر الفاروق العسكري 
مفاوضات سيدنا سعد مع الفرس في القادسيه 
وصلنا اخر حاجه ان جيش المسلمين فى طريقه للقادسية بقيادة سعد بن أبى وقاص لمواجهة الفرس .. وأتحرك الجيش بعد ما وصلت له أخبار إن الفرس بيستعدوا للهجوم على المسلمين والمفروض أن هينضم له جيش المثنى بن حارثة .. فوقف المثنى بالجيش وكان منتظر وصول سعد بن أبي وقاص بس للأسف المثنى بن حارثة ھيموت .. لأن كان عنده چرح من يوم معركة الجسر فأنتفض الچرح وڼزف جامد فماټ رضي الله عنه وأرضاه .
طيب كسرى حاكم الفرس يزدجرد كان مجهز جيش كبير المرة دى .. كان عدد الجيش حوالى ١٢٠ ألف جندى ومعاهم ٣٣ فيل .. وخرجوا فى طريقهم للمدينة .. طب كده سيدنا عمر عنده مشكلة .. إيه هي .. عدد الجيش قليل ..
طيب هو الجيش اللى خرج مع سيدنا سعد عدده كام حوالى ٤٠٠٠ .. طب فين باقى المسلمين 
زى ما احنا عارفين جيوش المسلمين متفرقة .. شوية فى بلاد الشام .. وشوية فى المدينة ..
سيدنا عمر لازم يتصدى للفرس .. فهيعمل إيه 
أولا هيبعت يجيب مسلمين من الشام .. وطبعا ده هياخد وقت طويل أكيد .. عشان كده هيبدأ سيدنا عمر يحول نقطة الضعف اللى عنده دى لنقطة قوة قدام الفرس .. طب إزاى 
سيدنا عمر هيبعت ال٤٠٠٠ اللى قلنا عليهم مع سيدنا سعد على بلاد الفرس .. وبعد كده هيبعت لباقى الجيوش اللى فى بلاد الشام عشان ييجوا على المدينة .. فكل ما تيجى له مجموعة ألف ونص مثلا يبعتهم ينضموا للجيش اللى راح بلاد الفرس ..
طبعا الفكرة دى بتبين أن سيدنا عمر هيبعت الجيش على مراحل .. وممكن حد يشوف الفكرة دى نقطة ضعف .. بس الحقيقة دى نقطة قوة قدام الفرس .. طب إزاى 
أصل الفرس لما شافوا كده فكروا إن جيش المسلمين كل شوية يوصل له مدد .. فالفرس اترعبوا .. معقول كل يوم مدد !! ليه هو جيش المسلمين هيبقى عدده كام فى الآخر !
فبالتالى الفرس مش هيعرفوا يحصوا عدد المسلمين ..
أما سيدنا عمر عنده العدد بتاع جيش الفرس وعارف عدد الأسلحة لكن الفرس مش حاصرين عدد المسلمين ولا أسلحتهم فنقطة الضعف اللى عند المسلمين سيدنا عمر حولها لنقطة قوة .. ويفضل كل كام يوم يبعت سيدنا عمر .. ألف .. ألف ونص ويقول لهم أول ما توصلوا قولوا الله أكبر بصوت عالى وأنضموا للجيش ..
وطبعا الفكرة دى كانت نتيجتها أن الفرس مش عارفين عدد المسلمين ولا عارفين المعركة هتبدأ إمتى فأتحطمت نفسية الفرس قبل ما المعركة تبدأ .. رضى الله عن سيدنا عمر وأرضاه .. شوفتوا سيدنا عمر عمل حاجة ممكن يتهيأ لكم أنها حاجة سهلة وبسيطة لكن هى فى منتهى الذكاء والإبداع ..
حاجة تانية هيعملها سيدنا عمر عشان يزود عدد جيش المسلمين .. هيعمل حاجة اسمها نفير عام يعنى أى حد يقدر يحارب فبسرعة ياخد سيف ويطلع بلاد الفرس طب هو ده الطبيعى لأ طبعا أصل الجهاد فرض كفاية .. يعنى إيه يعنى لو حبة ناس طلعوا يجاهدوا بكده هيغنوا عن باقى الناس إنهم يعملوا فرض الجهاد من غير ما يأثموا عليه وياخدوا ذنب .. لكن دلوقتى عدد جيش العدو كبير جدا والإسلام هيتعرض لحرب كبيرة فسيدنا عمر عمل نفير عام