رواية بعنوان إمراءة بين الطلاق والفقد الحلقة الأولى 1 بقلم الكاتبه ميمي حصريه وجديده

حوش اهل راجلي .. فتحت باب المطبخ ماكانش فيه حد موجود الشباب وعمي اكيد في العمل وسلفتي حتي هيا اكيد في العمل .. شبحت للمطبخ لقيته حايس اذكرت لما كنت معاهم في نفس الحوش كيف عمتي كانت تأمر وتنهى وتنوضني من الصبح بيش انضف وما رضتش انه نتعيين ونخدم وتوا مرت حسام متعينة وتطلع وتخدم ومافيش حد يقدر يتكلم لانها بنت خوها ..
حور ااااااه ليك الله يا البراني ..
نظفت المطبخ وحطيت الغدي وتيت السلاطة .. نقصت عليه ورجعت لي حوشي لقيت عمتي في الباب ..
حور الغدي واتي ..
خشت لا شكرتني ولا قالت شي .. خشيت لي حوشي وهو اصلا ملحق بنيناه في جنان اهل راجلي لانه حوشهم صغير وحسام يبي يتزوج وقاعد يبني في شقة بس فوق حوش اهله ومش كاملة وقرر يتزوج وهما عندهم دارين بس وحدة منهم كانت ليا يعني ماعندهمش مكان ف يبوا يسكنوا حسام عندهم لعند يكمل شقته .. لذلك اضطرينا نطلعوا واني بنيت الحوش من ذهبي .. خشيت درت الغدي وغسلت الحوايج وجففتهم قعد بس نكويهم درت سلاطة جي الظهر بسرعة .. رجع محمد والصغار خذيت الخضرة منه نضفتها وغسلتها وسقيت الغدي تغدينا وكملنا ..
محمد حور حوايجي حددتيهم واتيات لانه عندي عزي العصر 
حور لا والله مالحقت توا بس يجي الضي ونحددهم ..
محمد وليش ماحددتيهم شنو اديري طول اليوم هو بس غدي اللي درتيه ماعرفتيش تغسليهم وتحدديهم قبلها ..
حور خيرك ټعيط باهي 
محمد كات تفهميني غير شن درتي وفوقها تسألي خيرك ټعيط 
حور هذا كله وتقولي شن درتي نجري من الصبح لليل مانلحقش حتي نقعمز ومشيت لي اهلك درتلهم الغدي ..
قاعدة ما كملتش كلامي وقص عليا ..
محمد اوووووووه بدينا في الاسطوانة ها بتجملي انك درتي حاجة لي اهلي وتبدي تعايريهم ..
حور راه ما قلت شي خيرك معاي مولي من اقل شي تتعصب !
محمد اني تعبان وانتي تزيدي فيها نمشي نرقد احسنلي وع 4 نوضيني مش ترقدي وتنسيني ..
ناض من جنبي واني صافنة عليه ..
حور بيني وبين نفسي ليش هكي تغير بعد ماكان ېموت ع التراب اللي نمشي عليه ليش حياتنا انقلبت شغل وتعب ومشاكل بعد ما كنت متأملة نعيش بسعادة بعد قصة حبنا ..
حددتله حوايجه ومشيت نظفت المطبخ وجوني الصغار جابوا شناطيهم .. بديت نحظرلهم في دروسهم و واجباتهم وقعدت انحفظ في مصطفى املاء عنده . شبحت للساعة لقيتها 4 نضت نجري نوضته ناض من غير مايحكي وخش طول للحمام دوش وطلع بدل وتعطر وعلى آخر طرحة ..
محمد اني بنتأخر ماتستنونيش تعشوا ..
حور وين ماشي مش قلت عندي عزي 
محمد تحسابيني واحد من صغارك بيش تحاسبيني بعد العزي معزوم ع العشا ..
سكتت لأنه ماعنديش خلوق لي مشاكله وكل مانجي نحاسبه يقولي خنقتيني .. طلع هو واني قعدت انقري في الصغار وكملتلهم ..
مصطفي ماما مش بابا مايبيش يتعشا هنا ديريلنا بيتزا لانه هو مايحبهاش واليوم مش معانا واحني لينا هلبا عليها ديرهولنا ع العشا ..
حور حاضر حبيبي فورا ..
نضت درت العجينه و وتيت الصالصة و طلعت الجبنة من الثلاجة .. للمغرب ولعت الكوشة وقعدت اندير في البيتزا وحطيتها في الكوشة ودزيت مصطفي ع بيبسي كملتها ونضت توضيت وقعدت نصلي جي مرتضي ..
مرتضي ماما تلفونك ايرن 
كملت صلاة خذيت التلفون قاعدة مارميتش ملاية الصلاة لقيت ماما متصلة ثلاث مرات .. توترت خفت صاير معاهم شي رجعت اتصلت