ثانويه سعيده الجزء الاول بقلم الكاتبه حياة محمد حصريه وجديده

و تأنجچه فيمشى معاها لحد الباب ويلف ويرجع بيها ويفتح البلكونه ويقول إتفضلى.
شيماء إيه ده يا بابا عازمنى في البلكونه
الأب بره البيت ولا لأ وبعدين انا عاملك السندويتشات بإيدى يالا دوقى وقولى رأيك
شيماء تسلم إيدك يا حبيبي
مصطفى إيه ده إيه ده بتاكلوا من غيري وبعدين فين ماما 
الاب ماإنت عارف ماما بتحب تنام بدرى تعال كل معانا بس إنت إللي هتعمل الشاى.
مصطفى ياسلام وهيا متعملش ليه.
الأب لا شيماء النهارده اميره كلنا نخدمها.
مصطفى ماشى أنا هعمل الشاى للأميره بس ماتتعوديش على كده ماشي
شيماء ماشى يا أحلى اخ في الدنيا
_
فى اليوم التالي في المدرسة في حصة اللغه العربيه
الاستاذ دى قصيده مچنون ليلى لأمير الشعراء أحمد شوقي إحنا هندرسها السنه دى وهيا من أجمل القصائد الغزليه حتى إن موسيقار الاجيال محمد عبد الوهاب لحنها وغناها هو وأسمهان 
. يا شيماء بما إنك ماشاءالله صوتك حلو عايزك تسمعيها وتحاولى تغنيها لزميلاتك الحصه إللي جايه.
شيماء حاضر يا أستاذ 
هناء تغنى إيه إياكى أسمعك تغنيها مش كفايه أم كلثوم وإللى عملته فيا.
المدرس عملته فيكى عملت إيه أم كلثوم.
هناء إنت قلت إنها غنت أراك عصى الدمع وقلت نسمعها صح
الاستاذ فعلا
هناء وسمعتها وحفظتها كمان وبعدها أكتشف إنها بتغنى غلط.
الاستاذ ام كلثوم بتغنى غلط
هناء أه والله مش هيا عماله تقول نعم أنا مشتاق وعندى لوعة أكتشف إنها غلط والمفروض تقول بلى انا مشتاق وعندى لوعة 
الاستاذ لا لا لأ بسم الله ماشاء الله إيه الحلاوه دي ده إنتوا لازم تصقفوا لها على الكلمتين دول
نيفين هو كلامها صح يا أستاذ
الاستاذ للأسف أيوه
فيصقف البنات وهناء تنحنى بطريقة مسرحيه وتهلل نيڤين بعربجيه قشطه عليكى يا هناء ياقاهرة أم كلثوم
فيضربها الاستاذ بخفه على راسها إنتى إتهبلتى قاهرة أم كلثوم إيه يا جاهله 
هناء أنا رأيى
الاستاذ لا عشان خاطري خلى اليوم يعدى من غير ماتقولى حاجه تنقطينى فيها اقعدى زى الشاطره اسمعى مچنون ليلى
هناء من عينيا يا أستاذ وهركز كويس عشان أطلع غلطات أحمد شوقي واهو كله بثوابه
الاستاذ منك لله يا شيخه ربنا ينتقم لى منك.
بعد الحصه نيڤين بت يا شيماء سيبك من أحمد شوقي وغنى لينا اغنيه حلوه 
شيماء إيه رأيك أغنى إغضب لأصاله
نيفين ٠اغضب إيه عايزين أغنيه نصقف ونرقص مش نمسك في خناق بعض.
شيماء طب أغنيى لكم أغنيه لكاظم الساهر
هناء مين كاظم الساهر ده
نيفين ده واحد طالع جديد بس ماشاءالله طول ماهو بيغنى البنات بتديه دباديب.
هناء اكيد بعد كل حفله بيلف يبيعهم في المترو الدبدوب بعشره جنيه صح سيبك منه تعرفى تغنى فتكات.
شيماء إيه فتكات دى كمان.
هناء فتكات بتاعة أمين الهنيدى شويكار
فتكات كات كات مقدرش. ډمها شربات مية طورشى
نيفين لأ غني عينى بتاعت هشام عباس وحميد الشاعري.
فبدأت شيماء تغنى والبنات تصقف ونيڤين ترقص فأخذت هيام ورقه فاضيه وقطعتها صغير ورمتها على نيفين زى المعلمين لما ينقطوا الرقاصة في الافراح
يارا ممكن تغنيلى يا شيماء.
هيام أوعى تغنى لحد يا شيماء إللي عايزها تغنى تدفع الاغنيه بربع جنيه
نيفين يارخمه مش دافعه
يارا انا هدفع جنيه وغنيلى يا شيماء
هيام سمعيها يا شيماء وتغمز لشيماء
شيماء حاضر من عنيا اسمعى
يا سيدي أمرك أمرك يا سيدي
ولأجل خاطرك خاطرك يا سيدي
مقدرش أخالفك لأنى عارفك تقدر تحط الحديد في إيدى اسمع اسمع يا سيدي.
هيام أهى غنت لك
يارا لأ أنا مش عايزه الاغنيه دى
هيام البضاعه لاترد ولا تستبدل مش هيا غنت
يارا أه
هيام خلاص حلال علينا الجنيه
فتبدأ يارا ټعيط وتقول انا مش كنت عايزه الأغنية دى
حسناء مش قلت لك إبعدى عنهم أهم ضحكوا عليكى زى كل مره 
فتخرخ هيام لسانها لهم.
شيماء بس يا هيام حرام عليكي تعالى يا يارا وبالعند فيها هغنيلك إللي إنتى عايزاه ومش عايزة الجنيه
يارا إنتى طيبه أوى يا شيماء تعرفى تغنى طوق الياسمين لماجده الرومى
هناء طوق الإيه إيه النكد ده
يارا طب أغنيه شنطة سفر لأنغام.
نيفين ودى بيقدموها مع القهوه الساده والقرص في الجنازات
شيماء سيبك من المجانين دول بصى أنا مش حافظاهم بس أنا حافظه كلمات بتاعت ماجده الرومي تنفع.
يارا ماشى انا بحبها اوي
فتغنى شيماء بصوتها الرائع
يسمعنى حين يراقصنى كلمات ليست كالكلمات
يأخذنى من تحت ذراعى يزرعنى في إحدى الغيمات
وطبعا اخدت هناء ونيڤين يرقصوا سلوا بطريقة كوميدية ويعملوا حركات عشان يضحكوا شيماء وهيا بتغنى فضحكت شيماء وحتى يارا ضحكت معاهم
هيام طب ماإنتى دمك خفيف وبتعرفى تضحكى
يارا إنتوا إللي بترخموا عليا وتقولوا خواجايه
هيام ماإنتى كل شويه بابى هيدخلنى هارفرد مامى هتودينى فرنسا جدوا بيركبنى الفيل الاخضر خالوا إللي عدا البحر ومااتبلش
يارا هو فيه فيل أخضر
شيماء هو ده إللي أخدتى بالك منه ده إنتى ضايعه بجد
نيفين مش بقولكم خوجايه
يارا ياروخمه إنتوا كلكم روخمه
فى المساء في بيت أم رحمه
هنيه أهلا وسهلا يا أم سمير منوره 
كريمة منور بيكى يا حبيبتي
هنيه قومى يا رحمه اعملى فنجان قهوه مظبوط لماما أم سمير وسكر زياد لسمير يالا يا حبيبتي
رحمه حاضر يا ماما
كريمة شوفى يا هنيه انا جايه ليكى في موضوع مهم بقى سمير كان محوش قرشين عشان الشقه وطبعا إنتى عارفه إنه صرف أكتر من نص الفلوس دى الفترة إللي فاتت
فتنزل هنيه راسها بكسوف وتقول أه عارفه
في نفس الوقت قدمت رحمه القهوه لحماتها ولسمير.
كريمة صرف برضو في الشبكة والخطوبه مبلغ مش قليل وإنتى عارفه دلوقتى أقل شقه عايزه خلو رجل بالشيء الفلانى والايجار ڼار وإنتى عارفه سمير يوميته على قده مايستحملش
هنيه عارفه الله يعينه ويقويه.
كريمة وعشان كده أنا جايه اشورك وأخد رايك والمواضيع دى مفيهاش كسوف
هنيه خير يا أختي
كريمة بدل ما ندور على إيجار وفلوس ندفعها على الفاضي بقول ندهن له أوضته ونفرشها وتدخل بنتك فيها.
هنيه بتقولى إيه يا أم سمير.
كريمة بقول عين العقل بنتك تتجوز عندنا في الشقه وأهو البيت كبير وحتى سمير ياخد بحسنا أناوأبوه أما اخواته فصغيرين هيبقوا زى إخواتها ومش هتكسف منهم رحمه .قولتى إيه يا أم رحمه.
هنيه إيه رأيك في الكلام ده يا سمير 
بصت رحمه لسمير إللي كان موطى راسه وساكت وكأنه راضى بكلام أمه.
هنيه بس إحنا إتفقنا على...
كريمة مابسش ده عين العقل يا أم رحمه ماهو انا مش هسيب إبنى يستلف ويتداين عشان يتحوز الجواز غالى وعايز مصاريف وإنه يفرح وهو مستور مش مديون لحد احسن مايجرى وراه الديانه ولا يتحبس عشان ماضي على نفسه شيكات هو ده إللي عندنا وإلا إيه رأيك يا عروسه
بصت رحمه لأمها بإستعطاف وقالت بصوت واطي إللى ماما تقول عليه انا موافقه عليه
كريمة قولى ليا رأيك يا أم رحمه قولتى إيه 
بصت هنيه لسمير وبعدها بصت لرحمه وهيا مش عارفه تعمل إيه ولا تقول إيه لو رفضت معناها تفسخ الخطوبه وبكده تخسر سمير ومساعدته ليها هيا وأولادها ولو وافقت راح تكسر بنتها لان رحمه رافضه الجواز من الأول وهيا ضغطت عليها عشان تقبل فلو وافقت هتأكد لرحمه إنها باعتها لسمير عشان كده بتتنازل عن حقوقها وكمان رحمه ضعيفة ومش حمل البهدله وحماتها ست شديدة هتوريها الويل